Tamedyazt

 

Nekk  I yas-yennan zik swiɣ
A ziɣ aql-i d menwala
Sked urfan ur ṛwiɣ
Quzmeɣ-ten ulac tarewla
Nekki yenwan zik swiɣ
A ziɣ zgiɣ  d menwala
Ahat d iqqeḥ ay swiɣ
Neɣ ahat ddaw waya
Acḥal d win i nerfed
I wakken ur yettendella
Fell-as tafekka teqqed
Nekkes-as aṭṭan d tawla
S tiddi mi akken d-ibded
Yerra iman-is ur aɣ-d-iwala
Imi neḥṣa nɛemmed
Anef a nezg d menwala
Acḥal n tin i nbubb
Mi tella teɣli di lqaɛa
Ur as-neǧǧi ara ad tṣubb
Armi neẓra tettbedda
Ass-nni imi tt-nɛudd
D tameddakelt n lebda
Tettu kra i yas-nbudd
Ziɣ yur-s zgiɣ d menwala
Acḥal d wid i wumi  ur nunif
Akken ad hemlen di tẓegwa
nekkes fell-asen urrif
ass-a llan akken i asen-ihwa
a-t-nan zedɣen di liser
d awal ẓiden ɣur-sen i nerǧa
sser seg imawen nnsen yenser
a ziɣ zgiɣ d menwala
Anta tid ɣef ur netɣebbel
Ɣef ayd ur neṛwa tazzla
am akli fell-asent neqqel
aɣilif ur tent-ila
nessufeɣ-itent-id seg uxessaṛ
menɛent yis-ent ur igla
i yebɣun beddeɣ i ṣṣerṣer
a ziɣ zgiɣ d menwala
i wumi a d-tettnadiḍ fell-i
imi nekk d menwala
i wumi a d-tezziḍ ɣur-i
inaɣ nekk d menwala
i wumi a d-tqellbem fell-i
yak tennam-as d menwala
i wumi a d-testeqsimt fell-i
yak ɣur-kent d menwala
A win ḥesben d menwala
Ɣef yiman-ik i yella llem
fru deg allaɣ tilla
ur qqar awal susem
tamusni ɣur-k i tella
ttuɣaḍen ur ten-tezzem
win k-iɣedṛen s laman ur yegla
s kra i tliḍ d asirem