Taqbaylit - Amezruy

AMENNUΓ N TMEṬṬUT TAQBAYLIT

Tameṭṭut taqbaylit teṭṭef amḍiq d agejdan di tmetti tazzayrit. Fell-as i yebna wexxam, mebla nettat ur yezmir ara wemdan ad yidir, ur yezmir ara ad yaweḍ γer lebγi-s neγ γer yeswi-s. Telha-d s leqdic n wexxam d win n lexla

Tameṭṭut taqbaylit d nettat i d llsas, d nettat i d ajgu alemmas n wexxam, mebla nettat axxam ad yeγli, ad yedrem akken s yenna umedyaz ameqran n ccna n teqbaylit Sliman Σazem « A taqbaylit a tigejdit a tin i γef yebna wexxam » . Ihi ma nmuqel γer deffir, ad neg tamawt γef wussan iεeddan d akken tameṭṭut taqbaylit ur tesεi ara azref akken i t-yesεa urgaz . Di tmurt-nneγ izerfan n tmeṭṭut ttwarekḍen, bγan ad rbun amkan n tmeṭṭut di tmurt, bγan ad mḥun ula d later-is. Γas akken tettwaḥqer teṣber, tessusem, γas akken yeččur wul-is, aṭas i iεebba uγilif tezwar laεqel γer zdat-s akken yeqqar yenzi « kra n win iεetben yettγellit tagara » .
Lbaṭel yeḍran d tmeṭṭut taqbaylit dayen ur iqebbel laεqel, ula d lmal tagugamt mi ara d-yas wass a sen-d-yeḍru wayen akk d-yeḍran i tmeṭṭut a d-yehder, a d-yenṭeq deg wurrif .
Tameṭṭut taqbaylit asmi i twala yettwečč umur-is, rran fell-as ddel, sseγlin-d fell-as lbaṭel ur iqebbel laεqel, yeṭṭerḍeq-d wul-is deg wurfan, tekker-d mgal lbaṭel, tugi ddel, tugi tuqna s leqyud, tugi asrusu uqerru, tebγa ad tezdi lqed-is, tebγa ad yekkes wagu i iγum yṭṭij γef wallen-is, tebγa ad ifak fell-as yiḍ, tebγa ad tifsus fell-as taεkemt akk d tudert , tebγa a d-binen izerfan-is am wid n wergaz tebγa ad yali fell-as wass, tebγa ad yekkes fell-as laẓ d fad, tebγa ad ğğuğgen wussan-is ad tecbu tilawin n umaḍal .
Ma yella zik tetteddu εeryan, tura yewweḍ-d wass anda ara teṣṣer iman-is, anda ara ters taqendurt, ma yella zik tedda ḥafi, tura yewweḍ-d lawan anda ara ters tirkasin. Yewweḍ-d wass anda tameṭṭut taqbaylit tecba tilawin iteddun deg webrid n tneflit d usnerni d tuẓin γer zdat . Ayagi iban-aγ-d di tukkra-nsent γer weslali n tdukliwin yettnaγen γef yizerfan n tmeṭṭut, amedya taddukla « YESSI-S N FAḌMA N SUMER », tadukla n « RACHDA » … d waṭas nniḍen .

< Prev		Next >