Taqbaylit - Tidmiwin

Ilul Σebban Ṛemḍan ass n 10 si Yunyu 1920 deg Tmurt n Leqbayel; taddart-is d Iεezzuzen i d-yezgan tama n Laṛebεa n At Yiraten. Baba-s qqaren-as Muḥend. Yemma-s qqaren-as Faṭima, tḥemmel-it aṭas acku yella d anelmad ifazen ger tezyiwin-is. Deg lawan-nni, ulac aṭas n yiγerbazen imi tamurt tella ddaw temḥarsa n Fransa. Σebban Ṛemḍan iṛuḥ γer Blida akken ad ikemmel dinna leqraya-s deg teseddawit, ibbwi-d Lbbak (BAC) n tusnakt deg useggas n 1941. Deg tallit-nni i yebda yettfaq s yir tagnit i ttidiren Izzayriyen, ayen i t-yeğğan ad yeḥbes leqraya-s, ad imal γer tsertit. Ikcem s Amussu i Unalak n Tlelliyiin Timagdayin (MTLD, Mouvement Pour le Triomphe des Libertés Démocratiques). Deg useggwas n 1947, yuγal d imdebbeṛ deg ukabar-a, yerna yettikki deg tuddsa tuffirt (O.S., Organisation secrète) i yella tettheggi ttṛad mgal Fṛansa. Adabu n Fransa ifaq yes-s, dγa yeṭṭef aṭas n yimeγnasen n umussu, yeḥkem-asen s lḥebs. Σebban Ṛemḍan yettwaṭṭef ula d netta, deg useggwas n 1950. Yennuγ deg lḥebs almi yuγal yettuneḥsab d ameḥbus n tsertit, yesɛa azref ad iγer idlisen d yeγmisen.Yeffeγ-ed deg yennayer 1955. Yerra γer taddart-is. Syin yeffeγ s amadaγ akken ad yeddu d yemdukal-is n tegrawla. Yuγal iṛuḥ γer temdint n Lezzayer, yeṭṭef amkan n Biṭaṭ i yellan d ameḥbus. Seg meγres 1955 ar win n 1956, yessaweḍ Σebban ad yesdukel akk imussuten d yikabaren izzayriyen yellan niqal ur ttemsefhamen ara, akken ad ttekkin deg ttṛaḍ n uslelli aγelnaw. Yumen d tadukli i yessawaḍen. D Σebban Ṛemḍan i d-iheggan anejmaε n ṣṣumam anda i heggan lsas i tegrawla n Lezzayer.Mlalen yergazen d tlawin n tegrawla deg uzellagen, deg Γuct 1956. 20 n wussan, nutni ttmeslayen γef liḥala n tmurt d umennuγ n izzayriyen mgal amnekcam afṛansis. Dinna i d-ffγent tektiwin swayes ar a teddu tegrawla akk d tid γef ar a ters Lezzayer n uzekka. Σebban Ṛemdan yemmut di laameṛ-is 37 iseggasen, yettwanγa di Lmeruk di Dujembeṛ 1957. Σebban Ṛemḍan d netta i d bab n tegrawla, d netta i yessawḍen ad yesbed lsas i tegrawla n Lezzayer maca xedεent yemdukal-is akken xedεen merra agdud akw d tmurt n Lezzayer.

< Prev		Next >